Atlantic Way B&B

Ang kamalig, na nakikilala rin bilang taklab, bangan, baysa, amatong, o matong ay isang uri ng gusali na panglalawigan o bahay na pangkabukiran na mayroong nakadikit na mga gusaling pambukid. Sa Ingles, ang grange ay isang uri ng sinaunang kamalig na taguan at imbakan ng mga giniik, nilugas, o hinimay na mga butil; na maaari ring isang malaking gusaling pambukid na ginagamit sa pag-iimbak ng mga butil, mga dayami, o para sa pagbabahay ng mga hayop na pambukid. Maaari ring tumukoy ang grange sa isang gusali, na katulad ng kanlungan (shed), o garahe (paradahan), o bangan, na nasa loob ng isang lupaing-ari subalit nakahiwalay sa isang higit na mahalagang gusali, katulad ng isang bahay. Maaari rin itong isang kubo (farmhouse) na mayroon ng mga nabanggit na panlabas na iba pang gusali. Ang salitang grange ay nagmula sa Gitnang Ingles, na mula sa Latin na Midyebal na granica, na nagmula naman sa Latin na granum. Noong ika-14 na daantaon ang alam na unang paggamit ng salitang grange. Naging kasingkahulugan ng grange ang mga salitang Ingles na estate (asyenda), farmstead, farm (sakahan), at ranch (rantso). Sa Estados Unidos, ang grange ay naging isang katawagan para sa isang asosasyon ng mga magsasaka na itinatag noong 1867; tinatangkilik ng samahang Grange ang mga gawaing panlipunan, paglilingkod na pampamayanan, at paglo-lobby na pampulitika (paghahangad na maipluwensiyahan ang isang pulitiko o opisyal na pampubliko hinggil sa isang paksa o isyu. Sa una, ang grange ay isa lamang sa mga lodge o maliit na bahay ng isang pambansang asosasyong pangkapatiran ng kalalakihan na orihinal na binubuo ng mga magbubukid o magsasaka, bago naging pangalan ng mismong asosasyon.